Mapodisi kwa Umzinto, KwaZulu Natal ba tlhatlhamolotse segongwana sa diritibatsi mme ba tshwere motswantle go tswa Aforika Bophirima, le yo mongwe go tswa kwa Bogareng ba Aforika gammogo le mosadi wa moAforika Borwa yo go yang ka pegelo e leng mokapelo wa mmelaelwa wa kwa Aforika Bophirima. Botlhe ba lebaganwe ke ditatofatso tsa go tshola le go gweba ka diritibatsi tseo di lekanyetswang go R1.6 Million.
Go ya ka Mapodisi, babelaelwa ba tshwerwe ka Labotlhano, 12 Sedimonthole 2025 fa morago ga dipatlisiso tsa mapodisi go latela tiriso eo e leng kwa godimo ya diritibatsi mo basheng.
Mmelaelwamogolo o ne a tshwarwa ke mapodisi a le mo tseleng a kgoetsa koloi ya gagwe.
Diritibatsi tsa Crystal Meth gammogo le tšhelete eo mapodisi a dumelang fa e le dikungo tsa bosenyi di ne tsa fitlhelwa di fitlhilwe ka fa tlase ga setulo sa mokgweetsi.
Mapodisi a ne a gapa koloi ya mmelaelwa mme ba tsamaya le ena kwa legaeng la gagwe kwa Malangeni koo ba neng ba phuruphutsa mme ba fitlhela diritibatsi tse dingwe di fitlhilwe ka fa tlase ga bolao.
Fa morago ga foo, Mapodisi a ne a leba kwa ga mokapelo wa mmelaelwa yoo e leng mosadi wa moAforika Borwa koo gona ba fitlhetseng diritibatsi tsa Cocaine, Crack Cocaine le Crystal Meth.
Mo phuruphutsong ya bofelo kwa legaeng la mmelaelwa go tswa kwa Bogareng jwa Aforika, go bonwe dipilisi tseo di lekanyetswang go 5000 tsa heroine gammogo le lerole la heroine leo le lekanyetswang go 800kg.
Babelaelwa ka boraro bo solofetswe go tlhagelela kwa kgotlhatsekelo ya Scottburgh fa gautshwane.
