Metseletsele ya tshwaragano magareng ga maphata ao a lwantshanang le bosenyi kwa Gauteng, e lebisitse kwa go tshwarweng ga babelaelwa ba le 15 ka ditatofatso tseo di akaretsang go tshola diritibatsi, dithunya tseo di seng mo molaong gammogo le maiteko a polao.
Go ya ka Sebueledi sa Tirelo ya Sepodisi sa Aforika Borwa kwa Gauteng, Sergeant Roxanne Gibb, babelaelwa ba tshwerwe kwa Eldorado Park, Riverlea, Germiston, Booysens le Westbury.
Mapodisi a gapile dithunya di le pedi tsa 9mm, dikolo di le 14, matlhatlhela a dikolo a le mabedi, diphuthelwana di le 17 di na le diritibatsi tsa Crystal Meth, koloi eo e utswitsweng, disekerete tseo di seng mo molaong, diritibatsi tsa mandrax, dikhateriji tse pedi tsa dikolo le motekwane.
Go ya pele Sepodisi se begile gore magareng ga bao ba tshwerweng, go mmelaelwa wa dingwaga di le 24 wa kwa Riverlea yo a lebaganeng le tatofatso ya maiteko a polao le wa dingwaga di le 43 yo a lebaganeng le tatofatso ya go supa mongwe ka sethunya.
Babelwa botlhe ba setse ba tlhageletse kwa ‘kgotlatshekelong tseo di farologaneng.
