Kgotlatshekelo ya Potchefstroom e buseditse kwa morago, kgetse eo mo go yona monna mongwe a latofadiwang ka go logela Rraagwe le Kgaitsadie lemena la polao.
Go ya ka Colonel Adele Myburgh wa Sepodisi sa Aforika Borwa mo Porofenseng ya Bokone Bophirima, Kevin Alister Maponyane wa dingwaga di le 32, o lebaganwe ke ditatofatso di le pedi tsa go bolaiwa ga ga Johannes Maponyane ka Lwetse wa 2023 gammogo Elissa Nicolene Maponyane ka Motsheganong wa 2024. Batswasetlhabelo ka bobedi e ne ele baagi ba Ikageng kwa Potchefstroom.
Go ya pele Sepodisi se tlhalositse gore Kevin o ne a thapa banna ba le tlhano e leng Mpho Gift Visagie wa dingwaga di le 20, Thebogo Lipholo wa dingwaga di le 33, Phoka Raphoka wa dingwaga di le 37, Mpho Bennet Lombard wa dingwaga di le 33 gammogo le John Ramasubela Mohahabe wa dingwaga di le 49 gore ba bolae Rraagwe le Kgaitsadie. Botlhano jono bo ne ba tshwarwa ke Mapodisi fa morago ga polao ya ga Kgaitsadie Kevin ka 23 Motsheganong 2024 mme ba ne ba tlhagelela kwa kgotlatshekelo ka 27 Motsheganong 2024.
Kevin Maponyane o solofetswe go tlhagelela gape kwa kgotlatshekelo ka 11 Ngwanatsele 2025.
Kwa ntle le ditatofatso tseno, Kevin Maponyane o sekisediwa gape kwa Kgotlatshekelo kgolo ya Klerksdorp mabapi le dipolao di le pedi tseo di diragetseng ka Lwetse wa 2018 le Tlhakole wa 2019. Go begwa gape fa a lebaganwe ke melato e le mene ya go nna le sethunya le dikolo e se ka fa molaong go latela dikgetse tseo di tlhatlhetsweng kwa Ikageng ka Lwetse 2018 le Lwetse 2020, gammogo le kwa Potchefstroom ka Mopitlwe le Motsheganong 2019.
Mokimisinara Namaotshwareletse wa Sepodisi mo Porofenseng ya Bokone Bophirima, Majoro General Ryno Naidoo o akgotse mapodisi ka dira ka natla go netefatsa gore mmelaelwa o a tshwarwa le go amanngwa le dikgetse tseo di mo lebaneng.
