Go gobetse ba le babedi mme ga tlhokafala ba le bane mo ditlhaselong tsa go itseela molao mo matsogong kwa Lenasia
Baagi ba le lesomepedi ba tshwerwe kwa Lenasia ka Labotlhano, 13 Sedimonthole 2024 fa morago ga go keteka le go tshuba banna ba le barataro bao ba ba latofaditseng ka bosenyi. Ba le bane ba batswasetlhabelo ba ne ba amogwa botshelo mme ba le babedi ba ne ba isiwa kokelong ka dikgobalo tse di masisi.
Go ya ka dipego, baagi bano ba dingwaga di le magareng ga 19 le 62, ba ne ba tota batswasetlhabelo ba ba latofatsa ka go thuba mo matlong le bogodu, mme morago ba ba keteka le go ba tlhosetsa ka molelo.
Dikgang tseo di tshwanang
Molefetenente General Mthombeni yoo e leng Mokimisinara wa Mapodisi kwa Gauteng o kgadile tlhaselo ya borataro jono mme o tlhalositse fa go itseela molao mo matsogong e le tlolomolao e e masisi eo e ka se letlelelweng.
Bao ba tshwaretsweng molato ono wa go itseela molao mo matsogong ba lebaganwe ke molato wa polao le maiteko a polao mme ba solofetswe go tlhagelela kwa kgotlatshekelo ya Lenasia ka Labobedi, 17 Sedimonthole 2024.
