Go bonwe ditopo di le tlhano tsa bao ba ineetseng mo meepong eo e seng ka fa molaong kwa Krugersdorp

A le mongwe wa ba meepo eo e seng ka fa molaong o bolailwe mo thuntshanong le Mapodisi kwa Ermelo

Mapodisi kwa Krugersdorp, Gauteng, a bega fa a fitlhetse ditopo di le tlhano tseo a dumelang fa e le tsa bao ba amageng mo meepong eo e seng ka fa molaong mo nageng.

Ditopo tsa baepi bano bao ba itsegeng jaaka Zama Zamas, di bonwe kwa moepong yo o sa tlholeng o dira kwa makopanelong a mebila ya N14 le R28. Mapodisi a tlhalositse fa ba belaela gore ditopo tseno di ntshitswe kwa tlase mo moepong yoo mme tsa latlhelwa fa di bonweng gona.

Pegelo e tlhalosa gore ditopo tseno di bonwe ke mongwe yo o neng a feta ka tsela mme a itsise Mapodisi, mme ga jaana ditlhotlhomiso di tsweletse go totobatsa bonnete le mabaka ao a ka tswang a lebisitse kwa dintshong tseno.

Kgabagare mo tiragalong e nngwe ya meepo eo e seng ka fa molaong kwa Ermelo, Mapodisi a ne a tsweleditse Letsholo la Operation Vala Umgodi fa ba iphitlhela ba le mo thuntshanong le baepi bao ba seng mo molaong.

Mapodisi a tlhalositse gore ba ne ba lomiwa tsebe gore go na le tiragalo ya moepo yo o seng ka fa molaong gaufi le Club nngwe, mme ya re fa ba fitlha koo, bangwe ba babelaelwa ba ne ba tshaba fa ba bangwe ba thuntsana le Mapodisi.

Mo thuntshanong eo, yo mongwe wa babelaelwa o ne a amogiwa botshelo, mme Mapodisi a ne a gapa tlhoboro mo lefelong la tiragalo. Mapodisi a tshwere babelaelwa ba le bararo ba dingwaga tse di magareng ga 22 le 37 bao ba tlileng go tlhagelela kwa kgotlatshekelo ya Ermelo ka Labobedi, 17 Sedimonthole 2024 ka tatofatso ya go tsaya karolo mo meepong eo e seng ka fa molaong.

Mokimisinara namaotshwareletse wa Mapodisi kwa Mpumalanga, Majoro General Dr Zeph Mkhwanazi o tlotlomaditse Mapodisi ka go tshwara babelaelwa.

Mo tiragalong eo e amanang le tsa meepo eo e seng ka fa molaong kwa Stilfontein, Bokone Bophirima; Kgotlatshekelo ya selegae e ne ka Laboraro, 11 Sedimonthole 2024 ya atlholwa Setlhopha sa Batswantle ba le 19 bao ba saleng ba tshwerwe ka Ngwanatsele 2024 kwa shaft ya Margate, teng kwa Stilfontein.

Setlhopha seno sa ba dingwaga tse di magareng ga 20 le 40, se akaretsa ba kwa Lesotho ba le 14, ba le 4 ba kwa Mozambique le a le 1 wa kwa Zimbabwe.

Mongwe le mongwe wa Setlhopha seno o atlholetswe dikgwedi di le 24 tseo di beetsweng kwa thoko dingwaga di le tlhano tseo mo go tsona ope wa bona a seka a ba a amega mo bosenying jwa meepo eo e seng ka fa molaong. Mo godimo ga moo, mongwe le mongwe o atlholetswe go jelwa R6000 kgotsa go nna dikgwedi di le 6 mo kgolegelong, mme katlholo eno le yona e beetswe thoko dingwaga di le tlhano.

Pegelo ya Mapodisi a Bokone Bophirima e tlhalosa fa Lefapha la Merero ya Selegae le tsweletse ka dikgato tsa go rulaganya gore Batswantle bano ba busediwe kwa dinageng tsa bona.