Dingwe tsa dikolo mo nageng, ga di mo maêmong a go bulwa ka ntlha ya fa di ise di nêêlwe ditlhôkêgô tsotlhe tseo Lefapha la Thutô Bosetšhaba le tshepisitseng gore di tla isiwa pele ga pulo ka 01 Seetebosigo 2020.
Seno ke go ya ka pegêlô eo e rêbotsweng ke mekgatlhô ya bannaleseabê mo go tsa thutô eo e akaretsang ya Makgotlataolo a batsadi le ya barutabana ya SADTU, NAPTOSA, SAOU, PEU le NATU.
Mekgatlhô e tlhalositse fa moragô ga kôpanô eo e neng e e tshwerwe ka Labotlhano 29 Motsheganong 2020 gore tshedimosêtso eo ba e amogetseng go tswa kwa malokong a bona naga ka bophara, e lebisitse kwa goreng ba swetse gore Lefapha la Thutô ga le a ipaakanya go lekane gore dikolo di ka bulwa.
Go ya ka mekgatlhô eno, karolwana ya 28(2) ya Molaôthêô wa naga, e etêlêtsa kwa pele dikgatlhêgêlô tsa ngwana mo merêrông yotlhe eo e amang ngwana, ka jalo ga ba dumele gore go mo dikgatlhêgêlông tsa bana gore ba boêlê kwa sekolong ntse tshirêlêtsêgô le boitekanêlô jwa bona di sa totobadiwe.
Le fa gona re amogêla gore tshwanêlô ya ngwana go bona thutô le go boêla kwa sekolong di botlhôkwa, seno ga se fete go sekêgêla kgatlhêgêlô ya ngwana eo e leng mo molaôthêông.
Mekgatlhô e ikuêtse kwa dikolong tsotlhe, go akaretsa le tseo di nêêtsweng ditlhôkêgô tsotlhe go se bule go fitlhêlêla dikolo tsotlhe di nêêlwa ditlhôkêgô tsa tsona.
Bannaleseabê bano ba tlhalositse gore le fa gona Tona ya Lefapha Angie Motshekga a netefaditse go sa le gale gore ditlhôkêgô tsotlhe di teng, bontsi jwa dikolo di ne di ise di nêêlwe ditlhôkêgô tseo di akaretsang dimask le dibolayamegare ka Labotlhano 29 Motsheganong 2020.