Aforika Borwa ka bophara o tsoga kamoso, 29 Motsheganong 2024, a thologela kwa mafelong a a farologaneng ao a beetsweng thoko go nna a go tlhopa mo ditlhopong tsa bosetšhaba.
Ditlhopo tseno tseo ba le bantsi ba tlhalosang fa e le tse di botlhokwa mo nageng, di tla mo ngwageng yo mo go ona Aforika Borwa a digelang dingwaga di le masomeamararo puso ya temokerasi e ntse e tlhamilwe le go etelelwa pele ke lekoko la ANC, leo le saleng le kokometse setulo go tloga ka ngwaga wa 1994.
Bontsi bo tlhalosa fa lekoko la ANC le tlile go latlhegelwa ke tatedi mme seno se tlile go lebisa kwa goreng ba latlhegelwe ke bontsi ba maloko kwa kokoanopeomolao le go dira gore dithata tsa bona tsa go gatelela ditshwetso di fokotsege. Fa seno se ka direga, lekoko leo le busang le tla tshwanelwa ke go tlhakanela puso le makoko a mangwe jaaka go setse go diragetse mo dipusoselegaeng le dipusoteropo dingwe mo nageng.
Kgabagare bao ba rweleng maikarabelo a go tsamaisa ditlhopo mo nageng (IEC) ba tlhalositse fa tsotlhe di apere tshiamo gore ditlhopo di ka tswelela pele.
IEC e tlhalosa gore mafelo a go tlhopela a tlile go bulwa ka nako ya bosupa mo mesong mme a tlile go tswalelwa ka nako ya borongwe bosigo.